Serokê Konseya Rêvebir ya KCK-ê

 

Di 15-3-2011 an de dengên azadîxwaziyê li cade û kolanên Sûriye bilindbûn, û piştre bi çend rojan serhildana gel destpêkir, ku tevahiya pêkhatiyên civaka Sûrî pişikdarî têde kirin, û ew jî bo pêkanîna guhertina bingehîn û rizgarbûn ji zordarî û sitemkariyê.

Di vê serhildanê de, libat û livîna Kurdan jî digel ya Ereban ber bi azadiyê ve destpêkir, ku bi tevahî nasnameya vê rabûnê girêdayê genc û ciwanan bû, dûr ji nakokî û nelihevkirinên rêkxistin û partiyan.

Di xwepêşandana Qamişlo di roja Înê 29-4-2011 de, bi hezaran û ji tevahiya pêkhatiyan derketin, û bi yekdengî daxwaza azadî û guhertinê kirin.

Lê tişê ku vê carê çê bû, û ne wek carên berê bû, ku wêne, al û diruşm û siloganên girêdayê partiyekê hatin bilindkirin. Ku ev yek jî bû sedema derketina şerekî devikî di navbera tevgera ciwanan û ew kesên ku alên partiya xwe bilind kiribûn.

Mixabin… endam û alîgirên PYD al û siloganên partiya xwe bilind kiribûn.

Rêzdar Mûrad Qereyilan…

Hûn ji wan kesên banga berfirehiya tekoşîn û xebatê dikin, daku ji wê çarçoveya xwe ya partîtiya teng derkeve, û tiştê ku îro em dibînin serhildaneke bi beşdariyeke girseyî ku bi gelekî ji rêkxistina partiyekê mezintintire.

Lê tiştê ku roja Înê, li Qamişlo qewimî, egera wê yekê dixe rojevê de encamên metirsîdar bi xwe re bîne, û bibe sedemeke lawazkirina bereya azadîxwaz û demokrasîxwaz li dijî rijêma Sûriye.

Ji ber ku PYD cihê xwe di nav Koma we ya xwedî hurmet KCK de digire, em jî van daxwaziyan ji we re pêşkêş dikin, daku hûn jî ji aliyê xwe ve rênimayên tê xwestin bidin rêberî û endamên PYD:

1- Dûrxistina nasnameya partîtiyê ji vê rabûna genc û ciwanan, di riya van pêngavan re:

- ranekririna (bilind nekirina) wêne, al û siloganên partîtiyê di van meş û xwepêşandanên azadîxwaziyê de.

- Pişikdarî di van çalakiyan de bi awayekî giştî û pêkve, digel pêkhate û hêzên din, û bi taybetî genc û ciwan ku stûna vê şoreşê ne.

2- Ektîvkirina kenalên ragihandinê yên ser bi PKK ve, bo serxistina şoreşa gelê Sûriye, bê ku ev serhildana bi aliyekî yan bi partiyekê ve bê girêdan.

Em civîna we ya vê dawiyê digel nûnerên çend partiyên Kurdê Sûriye de bi giranbihayî dinirxînin, û em dixwazin vê yekê jî bo we bibêjin: Ew gelê ku dikarîbû piştgêriya gelek şoreşên azadîxwaziyê bike, û bi xurtî pişikdarî di şoreşa we de li dijî Faşîzma dewleta Tirk de kiribû û kiriye û dike û dê bike, bawer bikin: dê bikaribe xwe û şoreşa xwe ya şaristanî û aştîxwaziyê biparêze , û ew jî bi hêz û tîna geş ya genc û ciwanên xwe, ku îro agirê şoreşê û stûna pêkanîna wê guhertina bingehînin.

Girûpeke çalakvanên Kurdê Sûriye li Herêma Kurdistana Iraqê

Silêmaniyê - 1ê Gulana 2011

 

vegere